دكتور إسلام العربي يكتب: لطلبة الثانوية العامة.. لو عايز تدخل طب

0 104
د. اسلام العربي

طلبة ثانوية عامة اللي بيسألونا ندخل طب ولا ما ندخلش ؟ هقول لكم الطب مجال عظيم وادخلوا كلية الطب عادي بس في شوية نقط ناخدها في الاعتبار
1-
اوعى تدخل كلية الطب استخسار مجموع ، ده مجال لازم تكون حابه وشايف نفسك فيه يعني عندك شغف (وما تسألنيش يعني ايه شغف هتعرف بعدين) بس لو مش حابب الطب من البداية شوف لك كلية تانية وسيب مكانك لحد حلمه فعلا يكون طبيب
2 –
كمان اوعى تدخل طب علشان ماما عايزة تتمنظر قدام جارتكم ، اوعى .. جارتكم مش هتنفعك وأنت ماسك الجثة بأيد وبتكتب بالتانية في نفس الوقت اللي بتجري فيه لما تسمع كلمة move في امتحان التشريح ولا هتجاوب معاك في ورقة البايو ولا هتحفظ معاك أسامي أدوية الفارما ولا هتدخل معاك على حالة الباطنة في البكاريوس .. هتدخل لوحدك

3- دراسة الطب مكلفة ماديا وجسديا ونفسيا وانسوا التقديرات بالأرقام الفلكية يعني وأنتم داخلين الكلية ب 98 و 99% ، بعد سنة هتشوفوا اللي معديين 85% في أولى طب على إن اسيادنا راضيين عنهم و لو كنت تعبت شوية في الثانوية العامة علشان تجيب مجموع طب فالتعب في سنين الكلية السبعة هيكون مضاعف هتذاكر كتير وهتمتحن أكتر نظري وشفوي وعملي وهتتكلف شراء كتب وملازم وعضم وكورسات ومراجعات مش هيهون كل ده عليك إلا اقتناعك بالدراسة اللي اخترتها وأنت عارف متاعبها من البداية
4-
الطب عايز قلب ميت الناس اللي بتعيط كتير قبل الإمتحانات وجوة الامتحانات وبعد الامتحانات ممكن تفكر في حاجة غير الطب أنا فاكر كانت في واحدة زميلتنا في اللجنة كل ما تستلم ورقة الأسئلة تعيط تعبتنا بجد يعني كفاية إنها بتفسد الجو العام في اللجنة بعياطها بينما بيكون زملائنا اللي قلبهم ميت في نفس اللحظة بيضحكوا ، اه في اسئلة وامتحانات كده بتضحك عادي زي امتحان الجراحة في البكالريوس
5 –
ما تعدوش الأيام من أول يوم في الكلية ، هم سبع سنين يعني معديين الف ليلة وليلة هيعدوا بالطول بالعرض وهتتخرجوا وتبقوا دكاترة وتعرفوا بعدين إن الكلية مش التحدي الأكبر في حياتكم
6-
الإحترام واجب يعني تحترموا زملائكم اللي أكبر منكم في الكلية وتسألوهم وتستفيدوا منهم علشان دول مروا باللي أنتم فيه ولسه بيكافحوا ، خريجين طب بقى لما تشوفوهم اتصوروا معاهم دول عدوا من سنة سادسة ولسه عايشين
7-
لو دخلتم طب اعملوا حسابكم من البداية وذاكروا لشهادة أجنبية دي هتفيدكم كتير بعدين وهبقى افكركم

Comments

comments

يمكنك ايضاً قراءة المزيد لنفس الكاتب

Comments

تحميل...